EX-PRES. DUTERTE KINASUHAN NG KONGRESISTA

PORMAL na nagsampa ng kaso si House Deputy Minority Leader ACT Teachers Party-list Representative France Castro noong Martes laban kay dating Pangulong Rodrigo Duterte dahil sa umano’y mga banta sa mambabatas.

Kinasuhan si dating Pangulong Duterte ng grave threats sa ilalim ng Article 282 ng Revised Penal Code at Section 6 ng Cybercrime Prevention Act of 2012 sa Quezon City Prosecutor’s Office.

Ayon kay Castro, hindi na sakop ng Presidential immunity si Duterte kasunod ng pagtatapos ng kanyang termino bilang Pangulo ng bansa.

Sa reklamo ni Castro, ginawa ng dating pangulo ang mga pananakot na ito sa isang episode na ipinalabas noong Oktubre 11, 2023 sa  SMNI Network ni Pastor Apollo Quiboloy. 

Sa naturang broadcast umano gumawa ang mga pagbabanta at binansagan pa si Castro bilang isang komunista.

Si Castro, isang mambabatas na tagapagtaguyod ng iba’t ibang isyung panlipunan, kabilang ang transparency sa mga pampublikong pondo at pampublikong pananagutan, ay dati nang pinuna ang paglalaan ng confidential fund kay Vice President Sara Duterte, gayundin ang paggamit ng mga ito.

Ayon sa pahayag ng kampo ni Castro: “The threats issued by Mr. Duterte are firmly rooted in the practice of ‘red-tagging,’ which entails discrediting individuals or groups critical of government views. In the Philippine context, red-tagging constitutes an incitement with serious implications for the safety and well-being of the targeted individuals. It places Congressman Castro’s personal safety in jeopardy and hampers her capacity to effectively fulfill her constitutionally-mandated duties.”

Matatandaan na ang Office of the Vice President ay humiling ng P500 milyon, habang ang Department of Education (DepEd), ay naghahanap ng P150 milyon bilang confidential funds para sa 2024.

Si Castro ang nanguna sa oposisyon sa ilalim ng Makabayan bloc na kumuwestiyon ukol sa paglalaan ng confidential funds, partikular para sa OVP at Department of Education.

Kasunod nito, inilipat ang naturang pondo ng House of Representatives sa ibang ahensiya ng pamahalaan n mas higit na nangangailangan ng pondong ito.