KAMARA NAG-ADJOURN NA PARA SA CHRISTMAS BREAK

NAG-ADJOURN na ang Kamara de Representantes para sa kanilang Christmas break.

Bago ganap na isinara ang huling sesyon ngayong taon ay pinasalamatan ni House Speaker Ferdinand Martin Romualdez Jr. sa isang talumpati ang kanyang mga kasamahan sa Kongreso at mga empleyado sa ipinakita ng mga itong dedikasyon sa trabaho.

Ibinida ni Romualdez ang 20 LEDAC measures na naipasa nila ng mas maaga sa schedule.

“Of these twenty LEDAC identified measures, four have been enacted into law. 1. The National Employment Master Plan or the “Trabaho Para sa Bayan Act”; 2. The LGU Income Classification Act; 3. The Internet Transactions Act; and 4. The Public-Private Partnership (PPP) Code of the Philippines,” ani Romualdez.

Aprubado na rin aniya ang 17 SONA priority bills ni Pangulong Ferdinand “Bongbong” Marcos Jr., pitong buwan bago ang susunod nitong State of the Nation Address sa July 2024.

Binanggit din ni Romualdez na kabilang sa hanay ng kanilang accomplishments ay ang pagpasa ng 2024 General Appropriations Bill.

Nakatutok aniya ito sa paglaban sa mataas na inflation, pagpapapatatag ng presyo ng bigas at iba pang bilihin, paglalaan ng mas maraming trabaho at pagpapalawak ng social services.

Ipinagmalaki rin ng House Speaker ang iba pang mahahalagang naisabatas kabilang na ang Debt Condonation at Agrarian Reform Beneficiaries Act; Establishing Maharlika Investment Fund; Extending the Period of Availment of Estate Tax Amnesty; Establishing Specialty Centers in DOH Hospitals in Every Region; Institutionalizing the One Town, One Product (OTOP) Program; at ang Protection and Welfare of Caregivers Act.

Ayon pa kay Romualdez, niratipikahan ng House ang bicameral conference committee report hinggil sa “No permit, No Exam Prohibition Act,” ang pagbibigay ng benepisy sa octogenarians at nonagenarians gayundin ang dagdag na benepisyo sa mga centenarian, at ang Magna Carta for Seafarers.

Magbabalik ang sesyon ng Kongreso sa Jan. 22, 2024.