BUBONG NG SIMBAHAN SA MEXICO BUMIGAY, 10 PATAY

PATAY ang may 10 katao makaraang bumagsak ang bubungan ng isang simbahan sa Mexico habang may ginaganap na binyagan noong linggo, Oktubre 1, 2023.

Tinataya sa 30 hanggang 40 katao ang na-trap sa Iglesia Santa Cruz Church, isang Catholic church sa Madero, Tamaulipas, Mexico, ayon sa kumpirmasyon ng mga opisyal ng Mexico sa ABC News.

Isang binayagan na dinaluhan ng tinataya sa 100 katao ang nagaganap nang mangyari ang trahedya.

Tatlo sa mga sugatan ang dinala sa Civil Hospital habang pito sa General Hospital Dr. Carlos Canseco para lapatan ng kaukulang lunas.

Agad namang rumesponde ang federal at state security forces, civil protection at rescue corporations para magsagawa ng search at rescue operations.

Inaalam pa kung ano ang naging dahilan ng pagbagsak ng bubungan ng naturang simbahan.