HAMAS NASA TERROR LIST NG PH HINDI SA UDYOK NG US — NSC

NAGDESISYON ang National Security Council (NSC) na isama ang Hamas bilang isang teroristang grupo sa ilalim ng batas kontra-terorismo ng Pilipinas ay hindi inuudyukan ng Estados Unidos o Israel.

“Again, hindi po ito instigation of the United States; hindi po ito instigation of the State of Israel. We are doing it, again, because of our national interest,”  paliwanag ni NSC assistant director General Jonathan Malaya noong Lunes.

Sinabi ni Malaya na ang pagtatalaga sa Hamas bilang isang teroristang organisasyon ay ginawa matapos ang mga naunang imbestigasyon at napatunayang ang grupo ay nagtangkang makalusot at maglunsad ng mga aktibidad ng terorista sa Pilipinas.

“In fact, 2018, mayroong isang Hamas operative na bomb maker dito sa Pilipinas na inaresto ng Philippine National Police at ito ay dineport natin sa Turkey. And also last year, mayroon din silang operatiba na kumakausap sa mga local extremist groups para makapag-operate. din sa ating bansa,” ayon kay Malaya.

Idinagdag niya na ang mga pagsisikap na ito ay hindi isinasaalang-alang kung ang bansa ay makakakuha ng mga paborableng puntos sa alinmang bansa para sa panukalang ito.

“Ginagawa namin ito bilang pakikiisa sa mga tao at estado ng Israel na alam naman natin naging paksa ng walang pakundangan at nakamamatay na pag-atake ng terorista sa mga kamay ng teroristang organisasyon ng Hamas,” ani pa ni Malaya.

Sinabi pa ni Malaya na ang Hamas ay idineklara na bilang teroristang organisasyon ng Estados Unidos, European Union, Australia at marami pang ibang bansa.

Nauna nang sinabi ni National Security Adviser Eduardo Año na isusulong ng NSC ang pagtatalaga sa Hamas bilang teroristang organisasyon sa ilalim ng RA (Republic Act) 11479 bilang priority agenda ng Anti-Terrorism Council.

“Kasama ni Pangulong Ferdinand R. Marcos Jr., inaasahan namin ang mabilis na paglutas sa tunggalian na ito, ipinagdarasal namin ang kaligtasan ng mga inosenteng sibilyan, at nag-aalay kami ng aming pasasalamat sa Gobyerno ng Israel sa pagsisikap nitong protektahan ang aming mga mamamayan,” pahayag ni Año.