PHILHEALTH, HINDI MAGBABAYAD NG RANSOM SA CYBER HACKERS

INANUNSYO ng Philippine Health Insurance Corporation (PhilHealth) noong Lunes na hindi nito babayaran ang $300,000 o humigit-kumulang P17 milyong ransom na hinihiling ng  cyber hackers kapalit ng ninakaw na data mula sa kanilang website.

“Definitely po, hindi tayo magbabayad ng ransom,” giit ni PhilHealth Finance Policy Sector spokesperson and Senior Vice President Israel Francis Pargas sa interview ng  “24 Oras.”

Sinabi ng PhilHealth  na nagsusumikap silang ibalik ang  sistema noong  Lunes matapos matamaan ng Medusa ransomware.

Ang Ransomware ay isang uri ng virus na  maaaring harangan ang pag-access sa isang computer system at maaari lamang alisin sa pamamagitan ng pagbabayad ng ransom.

Mula noon ay isinara na ng PhilHealth  online system nito upang masuri ang epekto ng cyberattack at mas pinili ang manu-manong pagproseso ng benepisyo ng mga miyembro nito.

Ayon naman sa  Department of Information and Communications Technology (DICT),  ang cyber hackers ay nag-upload ng ilang impormasyon at mga dokumento mula sa PhilHealth sa dark web.

Nag-post din ang mga hacker ng countdown, na nagpapakita na ang Philhealth ay may walong araw lamang upang bayaran ang ransom kung hindi ay ilalabas nila ang data na ninakaw mula sa database nito.

“Parang may proof of life o proof of data kami kasi hindi mo naman makuha itong mga data and memo na ito kung saan kasi internal documents,” ayon kay DICT cybersecurity expert John Patrick Lita.

Nilinaw din ng  DICT na hindi nakompromiso ang database ng national health insurance.

“Ang nakuhang personal info ng mga empleyado. Mga internal memo, internal files, work files,” dagdag ng cybersecurity expert.

Sinabi ni Lita na ang grupo ay malubhang banta kaya naman ang mga ahensya ng gobyerno ay dapat mamuhunan para palakasin ang kanilang cybersecurity.