KAUNA-UNAHANG MINI SCIENCE CENTRUM SA CALABARZON PINASINAYAAN

INILUNSAD ng Department of Science and Technology (DoST) nitong Martes, September 26, 2023 ang kauna-unahang Mini Science Centrum sa Calabarzon region.

Ang pinakaunang Mini Science Centrum sa rehiyon ay matatagpuan sa Polillo Central Elementary School sa bayan ng Polillo sa lalawigan ng Quezon.

Ayon sa DOST Calabarzon, ang Mini Science Centrum ay bahagi ng kanilang Community Empowerment sa pamamagitan ng Science and Technology (CEST) program na layong ipakita ang mga interactive at natatanging exhibit sa mga konsepto at proseso ng agham na makakatulong sa mga guro at mag-aaral.

Pinangunahan nina Quezon Gov. Angelina “Doc Helen” Tan at DOST Calabarzon Regional Director Emelita Bagsit kasama si Prof. Fortunato T. dela Peña, dating DOST Secretary na ngayon ay chairperson ng Philippine Foundation for Science and Technology (PFST), ang pagpapasinaya sa Mini Science Centrum.

Pinasalamatan ni Tan ang DOST Calabarzon, PSFT, at Department of Education (DepEd) para sa inisyatibo at suporta ng mga ito sa paglalagay ng Mini Science Centrum sa bayan ng Polillo.

Ayon kay Tan, inaasahang maraming mga mag-aaral at mga guro ang makikinabang dito upang lalong mamulat ang kanilang kaalaman at interes sa agham at teknolohiya.

Ibinalita rin ng gobernadora na isa pang Science Centrum ang nakatdang buksan sa susunod na buwan sa bahagi ng Alabat at Quezon, Quezon.