P3.6B SHABU MULA THAILAND NASABAT SA PAMPANGA

NALAMBAT ng mga pinagsanib na operatiba sa pangunguna ng National Bureau of Investigation (NBI) ang may 530 kilo ng shabu na nagkakahalaga ng P3.6 billion mula sa Thailand sa isinagawang controlled delivery mission sa Mexico, Pampanga nitong Miyerkules, September 27.

Sinalakay ng mga ahente ng NBI, Philippine Drug Enforcement Agency (PDEA), Bureau of Customs (BOC), at National Intelligence Coordinating Agency (NICA) ang isang warehouse sa Purok 5, San Jose Malino, Mexico City.

Nakumpiska sa raid ang may 59 kahon na may 530 magkakahalong red tea bags at golden tea bags na naglalaman ng hinihinalang shabu.

Itinago ang mga ilegal na kontrabando sa ilalim ng mga plastic bags ng chicharon at tuyo.

Ayon sa NBI, nanggaling ang ilegal na droga sa Thailand at naipuslit papasok sa Subic Port sakay ng Sitc Shekou cargo vessel noong September 18.

Nagawang ma-infiltrate ng mga undercover agent ng NBI ang sindikato na nagresulta sa tagumpay na operasyon.

Nagsasagawa na ng imbestigasyon ang NBI sa mga dapat na managot sa nasabat na bilyong halaga ng shabu.

Samantala, nakatutok ngayon ang mata ng pamahalaan sa Subc na posible umanong nagagamit sa pagpupuslit ng ilegal na droga at agricultural products.

Nagpahayag ng pagkabahala si Justice Secretary Jesus Crispin Remulla kasunod ng pagkakadiskubre sa mga naipuslit sa bansa na droga mula sa Thailand.

“We have observed that Subic demands our immediate attention. It has emerged not only as a hub for illegal drug trafficking but also as a significant source of agricultural smuggling and various other forms of contraband entering our nation. Consequently, our vigilance over Subic, as well as all our ports, will remain unwavering.” ani Remulla.