TROPICAL STORM JENNY LUMAKAS

TUMINDI ang Tropical Storm Jenny at naging ganap na bagyo bago madaling-araw noong Lunes na nag-udyok sa weather bureau na itaas ang Tropical Cyclone Wind signal no. 1 sa ilang lugar sa Northern Luzon.

Ang Batanes, Babuyan Islands, ang silangang bahagi ng  Cagayan (Santa Ana, Gonzaga, Buguey, Santa Teresita, Lal-Lo, Baggao, Gattaran, Peñablanca), at ang silangang bahagi ng Isabela (Maconacon, Divilacan, Palanan) ay makakaranas ng malakas na hangin na maaaring magdulot ng kaunti hanggang maliliit na epekto, ayon sa ng Philippine Atmospheric, Geophysical and Astronomical Services Administration (PAGASA).

Pinapalakas din ni Jenny ang habagat, na nagdudulot ng pagbugso sa karamihan ng Mimaropa, Kanlurang Visayas, at Rehiyon ng Bicol.

Taglay ng bagyo ang maximum sustained winds na 120 kph malapit sa gitna, at pagbugsong aabot sa 150 kph. Ito ay huling natunton sa 655 km. silangan ng Aparri, Cagayan o 665 km. silangan ng Calayan, Cagayan.

Inaasahan ng PAGASA na maaabot ni Jenny ang peak intensity nito sa Martes at posibleng mag-landfall sa southern portion ng Taiwan sa Huwebes ng hapon o gabi. “Hindi pa rin inaalis ang landfall o close approach scenario sa Batanes area, bagama’t bumababa ang posibilidad,” dagdag pa ng PAGASA.

Ina-activate ng National Disaster Risk Reduction and Management Council (NDRRMC)  ang mga protocol  sa pagtugon sa emergency sa mga rehiyon na maaaring maapektuhan ng bagyong “Jenny,” ayon sa  Office of Civil Defense (OCD). “Ang Office of Civil Defense (OCD), kaninang hapon (Linggo) ay nagpatawag ng NDRRMC kasama ang mga kinauukulang RDRRMCs (regional DRMMCs) para sa isang Pre-Disaster Risk Assessment (PDRA) meeting para kay (Bagyo) Jenny. Patuloy kaming nakikipag-ugnayan sa iba’t ibang ahensya at sa aming mga katuwang sa rehiyon upang maghanda at magbigay ng sapat na tugon, na tinitiyak na ang lahat ng kinakailangang hakbang ay nasa lugar mula sa pambansa hanggang sa lokal na antas,” ayon kay OCD administrator Undersecretary Ariel Nepomuceno.

Ang pag-activate ng mga protocol na ito ng EPR ay sumusunod sa panawagan nina Pangulong Ferdinand R. Marcos Jr. at Defense Secretary Gilberto Teodoro Jr. na tiyakin ang kaligtasan ng mga komunidad na maaapektuhan at upang agad na magbigay ng mga serbisyo sa pagtugon kung sakaling magkaroon ng emergency, ani Nepomuceno. Ang mga protocol ng EPR ay mga hanay ng mga aksyon na dapat isagawa ng mga ahensya ng pambansang pamahalaan at mga yunit ng lokal na pamahalaan bago ang pananalasa ng bagyo at sa panahon ng mga operasyon ng pagtugon. PNA