DOTR NAGBABALA VS BEEP CARD NA NABIBILI ONLINE

NAGBABALA  ang Department of Transportation (DOTr) noong Martes sa publiko laban sa paggamit ng anumang produkto na  may “trademark and functionality”  ng beep card, kabilang ang mga anting-anting, trinkets, keychain, at bracelets na nabibili online.

Ayon sa DOTr, ang paggamit ng mga produktong ito bilang stored value card ay hindi “authorized fare media” sa alinmang pampublikong tren.

Ang sinumang indibidwal na mahuling gagamit ng mga ito ay iba-blacklist at kukumpiskahin ang kanilang mga produkto dahil sa pamemeke at paglabag sa intellectual copyright.

Iginiit ng DOTr na ang AF Payments, Inc., ang legal na may-ari ng beep trademark at logo at eksklusibong nag-isyu ng mga beep card, ay hindi pinahintulutan ang pagbebenta, paggamit at pamamahagi ng beep card. “Tanging ang mga lehitimong pinanggalingan na beep card ang tatanggapin sa alinmang rail station acceptance points para sa pagbabayad ng mga pamasahe sa tren,” sa advisory ng DOTr.