6.4 MAGNITUDE NA LINDOL YUMANIG SA DAVAO OCC

NIYANIG ng magnitude 6.4 na lindol ang bayan ng Sarangani sa Davao Occidental Miyerkules ng gabi, ayon sa Philippine Institute of Volcanology and Seismology (Phivolcs).

Ayon sa Phivolcs, natukoy and epicenter ng pag-uga 66 km. timog-silangan ng Sarangani Island.

Ang lindol, na naganap alas-7:21 ng gabi Miyerkules, ay tectonic ang pinagmula at may lalim na 139 km..

Naramdaman ang intensity 5 sa bayan ng Sarangani at Don Marcelino sa Davao Occidental; Kiamba, at Malungon sa Sarangani; at Digos City sa Davao del Sur.

Intensity 4 naman sa kalapit na General Santos City, Koronadal, Tupi, T’Boli, Polomolok sa South Cotabato; Jose Abad Santos sa Davao Occidental; Palimbang, at Esperanza sa Sultan Kudarat.

Naitala ang intensity 3 sa Davao City; Alamada, Banisilan, Kidapawan City, Magpet, Makilala, M’lang, Matalam, Pigcawayan, at Tulunan sa Cotabato; Kalamansig, Lambayong, President Quirino, Senator Ninoy Aquino, at Tacurong City sa Sultan Kudarat; at Lake Sebu, Tampakan, Santo Niño, at Surallah sa South Cotabato.