P2.2-B SHABU MULA MEXICO NA IDINEKLARANG TAPA NG BAKA NAKUMPISKA

TINATAYA sa P2.2 bilyong halaga ng shabu na idineklarang beef jerky o tapa ng baka ang nadiiskubreng abandonado sa Manila International Container Port (MICP).

Sa pahayag nitong Biyernes ni Bureau of Customs (BOC) Commissioner Bienvenido Rubio, dumating ang shipment sa MICP noon pang Pebrero 24, 2023 na galing umano ng Mexico.

Wala umanong nag-claim ng shipment hanggang sa isang Pre-Lodgement Control Order (PLCO) ang inisyu laban dito noong Setyembre 29.

Ayon sa mga awtoridad, ang shipment ay nakapangalan sa Logistica Integral Aduanal Meyma at Aime Express Logistics SA DE CV, Mexico.

Nang inspeksiyunin at i-scan gamit ang x-ray nitong Oktubre 4, lumitaw na ang mga kahon ay naglalaman ng 323 kilos ng shabu na tinataya sa P2.2 bilyon.

Ang ilegal na droga ay itinago sa laminated packaging ng beef jerky.

Isinagawa ang inspeksiyon sa harap ng mga operatiba ng Philippine Drug Enforcement Agency (PDEA), Philippine National Police-Drug Enforcement Group (PNP-PDEG), at Philippine Coast Guard.