PANALONG BSKE BETS NA MAY DQ CASE HINDI MUNA IPOPROKLAMA

NAGDESISYON.ang Commission on Elections (Comelec) en banc noong Miyerkules na suspindihin ang proklamasyon ng mga kandidato sa Barangay at Sangguniang Kabataan Elections (BSKE) na mananalo sa darating na halalan na may hindi pa nareresolbang mga disqualification cases.

“Kapag may merits ang kaso, may ebidensya laban sa isang kandidato at kung hindi pa nare-resolve ang kaso bago mag-eleksyon (If the case has merits, has evidence against a candidate, and it is yet unresolved before the elections), we ay handang suspindihin ang anumang proklamasyon ng sinumang kandidato na may nakabinbing disqualification cases,” pahayag ni Comelec chairperson George Erwin Garcia.

Ibinunyag ni Garcia ang desisyon ng en banc sa sideline ng paglagda ng memorandum of agreement (MOA) kasama ang Department of the Interior and Local Government (DILG).

Ang hakbang na ito ay sakop ang mga kandidatong may hindi pa may naresolbang mga kaso tulad ng maagang pangangampanya o pagbili ng boto.

Pinabulaanan ni Garcia ang mga argumento na nagtatapos ang hurisdiksyon ng poll body kapag lumabas na ang mga resulta ng mga boto.

“Hindi pwedeng manaig ang kalooban ng mga tao sa rule of law, and therefore, that is the principle that we are going to adapt as far as all violations of election laws are concerned,” aniya.

Sinabi ni Garcia na walang dapat ikabahala ang mga barangay kung hindi kaagad maiproklama ang nanalong kandidato sa kanilang lokalidad dahil sa nakabinbing disqualification case.

“May kagawad naman na number one, under local government code, siya muna ang magsa-succeed, hanggat hindi nare-resolve iyong kaso na nasa komisyo,” aniya.

Binanggit din ng Comelec chief ang posibilidad na magsagawa ng katulad na estratehiya para sa 2025 national at local Elections (NLE).