DOTR CHIEF KINASUHAN NG CYBERLIBEL SI VALBUENA

SINAMPAHAN na ng  cyber libel complaint noong Martes ni Transportation Secretary Jaime Bautista sa Department of Justice (DOJ) sina Manibela transport group leader Mar Valbuena at journalist Ira Panganiban ukol umano sa pag-uugnay sa kanya sa katiwalian.

“Marami silang accusations na ako raw ay tumanggap ng pera, ng suhol, hindi naman totoo. Kaya gusto ko lang protektahan ang aking pangalan na inalagaan ko for almost forty five years,” sinabi ni Bautista sa harap ng media sa DOJ.

Tinanong naman ng media si Bautista kung ano ang komento dahil ang kaso na isinampa niya ay maaaring maging balakid para isiwalat ang mga katiwalian sa gobyero.

“Hintayin na lang natin ‘yong magiging resulta ng proseso.

May proseso naman ‘yan eh, hintayin na lang natin,” sagot ng kalihim. Idinawit ng lider ng transport group na Manibela na si Valbuena at dating Land Transportation Franchising and Regulatory Board (LTFRB) information officer Jeff Gallos Tumbado si Bautista sa umano’y kaso ng panunuhol.

Mariing itinanggi naman ni Bautista ang anumang pagkakasangkot sa paratang na ito. Matatandaang sinabi ni Valbuena ang naging pahayag ni Tumbado na naghatid umano  ng pera ang suspendidong  si LTFRB chair na si Teofilo Guadiz III kay Bautista bilang bahagi ng “ruta for sale” scheme.

Kalaunan ay binawi ni Tumbado ang kanyang mga paratang na katiwalian sa loob ng ahensya at sinabi ang kayang naging pahayag ay bunsod umano ng na kanyang “impulse, irrational thinking, and misjudgment.”

 “I am saddened by the baseless allegations being thrown at me that I’m involved in corruption.

Please allow me to categorically say that I never accepted any money or favor since assuming the post of Transportation secretary,” ayon kay Bautista.