HEPE NG PASAY POLICE, 26 IBA SINIBAK DAHIL SA POGO HUB

PINATALSIK sa pwesto ang hepe ng pulisya ng Pasay City at iba pang police officers sa harap ng isinasagawang imbestigasyon hinggil sa Philippine Offshore Gaming Operator (POGO) sa lungsod na sinalakay ng mga awtoridad noong nagdaang buwan dahil sa umano’y human trafficking at iba pang ilegal na aktibidad.

Sina Pasay City Police Director Col. Froilan Uy, Substation Commander Capt. Criz Antonio Cataluña, at 25 iba pang police non-commissioned officers ay nahaharap sa pagsisiyasat sa posibilidad ng pagpapabaya sa tungkulin, ayon kay Philippine National Police (PNP) spokesperson Col. Jean Fajardo sa isang press briefing sa Camp Crame, Quezon City nitong Biyernes.

Ayon kay Fajardo, si Col. Mario Mayanes ang mauupong Pasay chief of police kapalit ni Uy habang si Cataluña ay papalitan ni Maj. Christel Carlo Villanueva.

“Kung matagal na pong nage-exist itong POGO na ito at may mga illegal activities po, remember mayroon po sa policy po ng PNP ‘yung one-strike policy. Kung mayroong nangyayari diyan within your knowledge at wala kang ginawa, then you will be charged for neglect of duty,” ani Fajardo.

Matatandaang noong Oktubre 27, sinalakay ng task force sa panguguna ng Presidential Anti-Organized Crime Commission (PAOCC) at Department of Justice ang isang POGO hub na nag-ooperate sa loob ng isang anim na palapag na gusali sa Williams Street, Pasay City.

Nadiskubre sa establisimiyento ang siyam na kuwartong KTV area, isang pharmacy na may doktor at dalawang kama ng pasyente, isang restaurant, isang hotpot “shabu-shabu” area, at siyam na vault ng pera.

Una nang sinabi ng PAOCC na maraming ebidensiya na nagtuturo ng nagaganap na sex trafficking sa lugar.