GUADIZ BALIK LTFRB

IBINALIK na sa Land Transportation Franchising and Regulatory Board (LTFR­B) ang sinuspindeng chairman nito na si Teofilo Guadiz III.

Ito ay makaraang bawiin ni Pangulong Ferdinand “Bongbong” Marcos Jr. ang ipinataw na suspensyon dito.

Kinumpirma ng tanggapan ni Executive Secretary Lucas Bersamin na tinanggal na ang suspension kay Guadiz makaraang bawiin ng dating executive assistant nitong si Jeffrey Tumbado ang bintang na sangkot ito sa korapsiyon sa ahensiya.

“As such there stands no reason to place chairperson Guadiz under preventive suspension unless a supervening event maintaining the same accusations against him are put forth before the OP,” ayon sa nilabas na pahayag ng Malacañang.

Una nang kinumpirma ni Transportation Secretary Jaime Bautista ang pagbabalik ni Guadiz sa LTFRB sa Lunes, Nobyembre 6.

“The DOTr issued a special order lifting the suspension of Teofilo Guadiz III effective Nov 6, 2023 on the basis of an order from the office of the President signed by Executive Secretary Lucas P. Bersamin lifting the 90-day suspension,” saad ni Bautista sa isang statement.

Naging kontrobersiyal si Guadiz makaraang ibunyag ni Tumbado ang umano’y talamak na korapsiyon sa LTFRB kung saan milyones ang sangkot na halaga.

Matapos ang pagbubunyag ay binawi rin ni Tumbado ang kanyang pahayag at sinabing nadala lamang siya ng bugso ang kanyang damdamin.

Ipinatawag si Tumbado sa Kongreso para sa mas malalimang imbestigasyon kung saan hindi nito napanghawakan ang akusasyon dahilan para patawan siya ng 10-araw na contempt.