THE VOICE KIDS PH SINGER-ACTOR YOHANCE PUMANAW SA EDAD NA 17

SUMAKABILANG-BUHAY na ang singer-actor na si Yohance Levi Buie noong Biyernes, Nobyembre 10, 2023 sa batang edad na 17.

Si Yohance ay isa sa mga contestant ng The Voice Kids Season 3 noong 2016.

Ang kanyang pagpanaw ay ibinalita ng Virtual Playground Global, ang kanyang talent management company, sa pamamagitan ng Instagram page noong Sabado, Nobyembre 11.

“It is with heavy hearts that we announce the passing of YOHANCE LEVI A. BUIE. We are deeply saddened by this loss, and our thoughts and prayers go out to his family and loved ones during this difficult time,” anang post.

“His passion and dedication to his craft were evident in every role he took on, and he will be remembered for the indelible mark he left on the world of entertainment,” dagdag pa ng post.

Sa mga nais makiramay at nais siyang nasilayan sa huling sandali, ang kanyang mga labi ay nakalagak sa St. Peter’s Antipolo.

Bagama’t hindi binanggit ang dahilan ng kanyang pagpanaw, pinaalalahanan ng kanyang talent management firm ang lahat ng mga nakararanas ng mental distress na humingi ng agarang tulong medikal.

Bukod sa pagkanta, si Yohance ay nagpakita rin ng galing sa pag-arte sa 2022 action-thriller film na Day Zero at 2023 mini-series na The Day I Loved You.