DUTERTE SINUBPOENA NG KORTE SA KASONG GRAVE THREAT

PINADALHAN ng subpoena ng Quezon City Prosecutor’s Office si dating Pangulong Rodrigo “Digong” Duterte nitong Miyerkules upang humarap sa korte at sagutin and reklamong grave threat na isinampa laban sa kanya ni House Deputy Minority Leader at ACT Teachers Party-list Rep. France Castro.

Nakasaad sa isang pahinang subpoena na ipinalabas ni Senior Assistant City Prosecutor Ulric Badiola ang kautusan sa dating pangulo na magsumite ng kanyang counter affidavit sa hapon ng Disyembre 4 hanggang 11.

“Under and by virtue of the authority vested in me by the Revised Charter of Quezon City and other existing laws, respondent (Duterte) is hereby commanded to appear before the Office of the City Prosecutor, Justice Cecilia Muñoz Palma Building (Department of Justice), Elliptical Road, Quezon City,” anang subpoena.

Inatasan din ang dating pangulo na magsumite ng affidavit ng kanyang mga saksi na susuporta sa kanyang dokumento.

Pinadadalo rin ng QC Prosecutor’s Office si Castro at mga testigo nito upang patunayan ang katotohanan sa nasabing alegasyon hinggil sa kasong isinampa nito.

Magugunita na nag-ugat ang nasabing kaso matapos umanong pagbantaan ni Duterte si Castro na ang intelligence funds umano ay gagamitin nito upang ipapatay ang kongresista na umano’y may ugnayan sa makakaliwang grupong Communist Party of the Philippines-New People’s Army (CPP-NPA).

Ang banta ay inihayag diumano ng dating pangulo sa SMNI television network sa lungsod ng Davao.