REP. RALPH RECTO PINANGALANANG BAGONG FINANCE SECRETARY

KINUMPIRMA nitong Huwebes, Enero 11, 2024, ng Malacañang ang paghirang bilang bagong Finance secretary kay Deputy Speaker at Batangas Rep. Ralph Recto.

Sa kanyang mensahe sa mga reporter, sinabi ni Presidential Communications Office Secretary Cheloy Garafil na pangungunahan ni Pangulong  Ferdinand “Bongbong” R. Marcos Jr.  ang panunumpa ni Recto ngayong Biyernes, Enero 12.

Papalitan ni Recto si dating Finance Secretary Benjamin Diokno.

Kasabay ni Recto na manunumpa ang business tycoon na si Frederick Go bilang economic czar ni Marcos.

“Rep. Ralph Recto and Frederick Go are scheduled to take their oath tomorrow before President Ferdinand R. Marcos Jr. as Secretary of Finance and Special Assistant to the President for Investment and Economic Affairs, respectively,” ani Garafil.

Hindi binanggit kung ano ang dahilan bakit papalitan sa posisyon si Diokno na no comment ang naging sagot ng tanungin ng media.

Ang paghirang kay Recto bilang bagong Kalihim ng Pananalapi ay kinumpirma rin ng kanyang maybahay na si dating Batangas Rep. Vilma Santos-Recto.

Nanawagan si Santos-Recto sa publiko na suportahan ang kanyang mister sa bago nitong tungkulin sa pamahalaan.

Umani naman ng suporta mula sa kanyang mga kapwa senador ang pagpili kay Recto bilang bagong Finance Secretary.

Kabilang sa nagbigay sa kanya ng suporta ay sina Senate President Juan Miguel Zubiri, Senator Sherwin Gatchalian, at Senator Sonny Angara.

Tinawag pa ni Zubiri si Recto na isang “numbers genius.”

 “More than most, he understands how to bridge the gap between the abstractions of mathematics and the very concrete realities that we face as a nation,” ani Zubiri.