VP SARA TATAKBO SA SUSUNOD NA ELEKSIYON

INIHAYAG ni Vice President Sara Duterte na tatakbo siya sa public office sa susunod na halalan.

Ginawa ni Duterte, anak ni dating Pangulong Rodrigo Duterte, ang pahayag sa kanyang pagdalo sa flag-raising ceremony sa Bgy. Bago Gallera, Davao City nitong Lunes.

Aniya, ang kanyang mga kapatid na sina Davao City Rep. Paolo “Pulong” Duterte at Davao City Mayor Sebastian “Baste” Duterte ay nagbigay ng pahiwatig na maaaring hindi na muling tumakbo sa eleksiyon.

Matatandaang noong Enero 6, sinabi ng matandang Duterte na ang kanyang babaeng anak na kasalukuyang bise presidente, ang siyang mamumuno sa kanilang pamilya sa politika.

“Ewan ko si Pulong, di ko mabasa. Pero si Inday probably has a… baka gusto pa niya manuntok. Hayaan mo muna siya doon sa Maynila. Pero ako I’m tired of politics. Count me out,” anang dating pangulo sa isang press conference sa Davao City.

Samantala, hindi naman binanggit ng bise presidente kung anong posisyon ang kanyang tatakbuhan sa susunod na halalan.