5-YEAR VALIDITY NG PRC ID PASADO NA SA KAMARA

INAPRUBAHAN ng House of Representatives sa huling pagbasa ang panukalang naglalayong palawigin ng mula tatlo hanggang limang taon ang validity ng Professional Regulation Commission (PRC) ID cards at registration certificates.

Ang House Bill No. 9764 ay lumusot na sa plenaryo nitong Miyerkules.

Kabuuang bilang na 234 mambabatas ang bumoto pabor sa panukala habang wala namang tumutol.

Ayon sa mga kongresista, ang hakbang ay makapagpapabawas sa bilang ng taunang renewal transactions at magpapagaan sa pressure ng PRC appointment system.

Ang panukala ay pangunahing inakda nina House Committee on Civil Service and Professional Regulation chairman at Bohol Rep. Kristine Alexie Tutor, Parañaque Rep. Edwin Olivarez, Ilocos Norte Rep. Angelo Marcos Barba at Northern Samar Rep. Paul Daza.

Inilarawan ni Tutor ang bill na “non-controversial” kasabay ng pahayag na kumpiyansa siyang ipapasa rin ito ng Senado.

Ayon pa sa Bohol solon, aabot sa isang milyong propesyonal ang makikinabang sakaling maisabatas ang panukalang ito.

Dagdag pa ng mamababatas na alinsunod din ito sa  pagtalima sa Ease of Doing Business at Anti-Red Tape Law.