LISENSIYA NG 6 SPORTS CAR DRIVERS NA NAGKARERAHAN SA TAGAYTAY SINUSPINDE NG 90-ARAW

SINUSPINDE ng 90 araw ng Land Transportation Office (LTO) ang driver’s license ng anim na indibidwal na nagkarera sa Tagaytay gamit ang mga sports car na viral ngayon sa social media.

Ang pagsuspinde ng lisensya ay tugon sa kautusan ni President Ferdinand Marcos Jr. na gawing ligtas ang mga kalsada para sa lahat ng road users.

Sinabi ni Transportation Secretary Vince Dizon na hindi papayagan ng Department of Transportation (DOTr) at LTO ang iresponsableng pagmamaneho sa kalsada na maglalagay sa kapamahakan sa mga inosenteng road user pati na komyuter at pedestrians.

“Paulit-ulit na sinabi ni Pangulong Bongbong Marcos na dapat gawing ligtas ang kalsada para sa lahat. Hindi tayo papayag na bastusin at lumabag ang ilang iresponsable at reckless na driver sa traffic rules,” ani Secretary Dizon.

Hinikayat din ni Dizon ang mga social media users na agad i-report sa DOTr o LTO ang mga motoristang lalabag sa batas trapiko.