‘NO WORK,NO PAY’ SA OCT. 30 — DOLE

IPATUTUPAD ang patakarang “no work, no pay” sa barangay at Sangguniang Kabataan elections holiday sa Oktubre 30.

Ayon sa inilabas na advisory ng Department of Labor and Employment (DOLE) noong Sabado,  pinaalalahanan nito ang mga employer na sundin ang pagbabayad ng sahod para sa mga magre-report sa trabaho sa araw na ito.

Inilabas ni Pangulong Ferdinand R. Marcos ang Proklamasyon Blg. 359 noong Okt. 9, na nagdedeklara sa araw ng halalan bilang isang espesyal na araw na walang pasok upang bigyan ang publiko ng pagkakataong lumahok sa BSKE.

“Kung hindi nagtatrabaho ang empleyado, dapat ipatupad ang no work, no pay principle maliban na lang kung may paborableng polisiya, practice, o collective bargaining agreement ng kumpanya na nagbibigay ng bayad sa isang espesyal na araw,” ayon sa DOLE.

Sa kabilang banda, ang isang empleyado na nag-uulat para sa trabaho sa panahon ng espesyal na holiday ay dapat bayaran ng karagdagang 30 porsiyento ng pangunahing sahod sa unang walong oras ng trabaho.

Kung ang empleyado ay magtrabaho nang lampas sa walong oras, ang manggagawa ay tatanggap ng karagdagang 30 porsiyento ng oras-oras na rate sa nasabing araw. Ang isang empleyado ay makakatanggap ng karagdagang 50 porsiyento ng pangunahing sahod sa unang walong oras ng trabaho kapag ang espesyal na holiday ay bumagsak sa araw ng pahinga ng empleyado.

Para sa trabahong ginawa ng higit sa walong oras sa espesyal na araw na pumapatak din sa araw ng pahinga ng empleyado, babayaran ng employer ang empleyado ng karagdagang 30 porsiyento ng oras-oras na rate.