‘INJECTION ATTACKS’ SA CEBU CITY, INIIMBESTIGAHAN NA NG PULISYA

SINISIYASAT na ng pulisya ang diumano’y mga insidente ng injection attacks sa Cebu City itong nagdaang dalawang linggo,

Ayon kay Cebu City Police Office deputy director for operations Lt. Col. Janette Rafter, sinusuri na nila ang  CCTV footages  sa mga lugar sa palibot ng isang mall sa lungsod kung saan sinasabing may mga nanunurok umano ng mga heringgilya sa mga taong napapadaan.

Ayon sa opisyal , batay sa kanilang paunang imbestigasyon, wala namang nakuhanang komosyon ang mga CCTV sa lugar.

Wala rin umanong natatanggap ang pulisya na reklamo hinggil sa nasabing mga pag-atake.

Aniya, natukoy na nila ang taong unang nag-post ng nasabing insidente noong nagdaang linggo na isang menor de edad.

Sinisiyasat na rin umano nila ang iba pang mga nag-post online hinggil sa mga katulad na pangyayari.

Siniguro ng opisyal sa publiko na kontrolado nila ang sitwasyon at nagpakalat na sila ng karagdagang kapulisan para sa monitoring at mapigilan ang sinumang magtatangkang gumawa ng krimen.

Nagtalaga rin ng mga dagdag na security guards ang mall para higit na maprotektahan ang kanilang mga parokyano.