PULIS-NAVOTAS  GUILTY SA KASONG HOMICIDE SA PAGPATAY KAY JEMBOY BALTAZAR

ISANG police staff sergeant ang napatunayan nitong Martes na guilty sa kasong homicide kaugnay ng pagkamatay ng 17-anyos na si Jerhode “Jemboy” Baltazas  noong Agosto 2023 sa isang kaso ng mistaken identity.

Sa kautusang ipinalabas ng Navotas Regional Trial Court Branch 286, si Police SSgt. Gerry Maliban — na unang nagpaputok ng baril—ay guilty sa kasong homicide.

“There being an incomplete justifying circumstance of performance of duty and the presence of voluntary surrender… the Court sentences Gerry Maliban y Sabate to suffer an indeterminate prison term of four years, two months and ten days of prision correccional medium as minimum, to six  years, four months and twenty days of prision mayor minimum as maximum and to pay the heirs of Jerhode jemboy Baltazar and the sum of P50,000 as civil liability and the further sum of P50,000,” anang kautusan ng korte.

Pinawalang sala naman si Police SSgt. Antonio Bugayong matapos na mapatunayang hindi ito nagpaputok ng baril sa isinagawang operasyon.

Apat na pulis naman ang guilty ng illegal discharge of firearms. Sila ay sina Police Executive MSgt. Roberto Balais, Police SSgt. Nikko Esquilon, Police Corporal Edmard Jade Blanco, at Patrolman Benedict Mangada.

“This is a story of hot pursuit operation that ended in tragedy. The death of Jerhode ‘Jemboy’ Baltazar, who is not the suspect, could have been avoided had a police officer applied self-restraint, for a police officer is not justified in shooting a person just because that person did not heed his call to surrender,” anang desisyon ng korte.

Ayon kay Branch Clerk of Court Anne Kathryn Castro-Diaz, ang apat na pulis na na-convict sa kasong illegal discharge of firearms ay parurusahan ng pagkakulong ng tinataya sa anim na buwan at isang araw subalit maaaring  mapalaya kung nakulong na ng higit sa kanilang sentensiya.

PAMILYA BALTAZAR DISMAYADO SA MABABANG HATOL

Dismayado ang pamilya Baltazar sa naging desisyon ng korte na ayon sa kanila ay dapat na mas mabigat na kaparusahan ang ipinataw sa mga akusadong pulis.

Matatandaang si Jemboy ay nabaril at napatay  noong Agosto 2, 2023 habang mangingisda at ang mga pulis naman ay may hinahabol na suspect sa isang krimen sa Bgy. NBBS Kaunlaran.

Ayon sa kasama ng biktima, naghahanda na sila mg kanilang bangka nang bigla na lamang umanong magpaputok ang pulis.

Sa takot ay napatalon umano sa tubig si Jemboy hanggang sa ito ay mapuruhan ng bala na galing sa baril ni Maliban.