P1 DAGDAG- PASAHE INAPRUBAHAN NG LTFRB

INAPRUBAHAN  ng Land Transportation Franchising and Regulatory Board (LTFRB) ang P1 na provisional fare increase para sa mga jeep sa buong bansa.

Sa isang desisyon noong Martes, sumang-ayon ang regulatory board na ibigay ang provisional increase habang pinag-isipan pa nito ang petisyon na itaas ang pamasahe ng P5.

Ang pagtaas ng pamasahe ay magkakabisa sa Oktubre 8 para sa  moderno at tradisyonal na mga jeepney.

Ang pamasahe sa tradisyunal na jeepney mula P12  ay magiging P13 habang sa modernong jeepney ay mula P14 ay magiging P15.

Sinabi ng LTFRB na ito ay dahil na patuloy na pagtaas ng presyo ng produktong petrolyo nitong mga nakaraang buwan kaya nagpasya ang gobyerno na mamigay ng P2.95 bilyon na subsidy sa mga operator ng pampublikong sasakyan. 

Sinabi ni LTFRB chairman Teofilo Guadiz III na pinag-iisipan na ng ahensya ang pagtataas ng pamasahe simula pa noong kalagitnaan ng Setyembre.

Bagama’t nakahanda ang regulatory board na ibigay ang hiling ng taas  sa pamasahe, sinabi nito na kailangan pa rin ng National Economic and Development Authority na pag-aralan kung kailan at kung magkano ang kinakailangan na itaas para maiwasan ang pagkakaroon ng inflation.