6K SHOW CAUSE ORDER VS BSKE BETS INILABAS NG COMELEC

INIHAYAG ng Commission on Elections (Comelec) na naglabas na sila ng mahigit 6,000 show cause order laban sa mga kandidato sa darating Barangay at Sangguniang Kabataan (BSKE) na umano’y sangkot sa premature campaigning.

Ayon sa Comelec Anti-Epal Taskforce, 6,463 show cause order na ang nailabas bunsod ng mga reklamong inihain sa poll body bago ang pagsisimula ng campaign period sa Oktubre 19.

Sa bilang, 125 sa 301 posibleng disqualification petition ang naihain na sa Comelec division kasunod ng proseso ng pag-verify ng Task Force, gayundin ang pagtanggap ng “unsatisfactory answers” mula sa mga kinauukulang kandidato.

Ang mga petisyon na ito ay ipapa-raffle sa mga dibisyon, ihahatid ang notice at susundan ng summary proceedings, ayon sa  Comelec.

Naunang nangako ang poll body na gumawa ng mga disqualification resolution bago botohan sa Okt. 30.

Samantala, ang Task Force Anti-Epal ay naglabas ng 148 subpoena sa BSK bets na may verified complaints at ibinaba ang 558 na reklamo dahil sa kawalan ng factual basis.

Samantala, ang Comelec-Second division ay diniskwalipika ang isang BSK candidate dahil sa kanyang conviction sa isang administrative case noong 2005.

Sa isang pahayag, kinilala ng poll body ang kandidato na si Ireneo Polinar Lapis, na tumatakbo para sa punong barangay ng Barangay Pualas, Don Carlos, Bukidnon.

“Para sa pagiging tinanggal sa pampublikong opisina bilang resulta ng natuklasan ng Ombudsman na si (Lapis) ay nagkasala sa administratibong kaso laban sa kanya, si (Lapis) ay disqualified na tumakbo para sa anumang elective public office,” ayon sa Comelec Second Division resolution.

Si Lapis ay hinatulang guilty ng dishonesty kaugnay ng “Section 52(a) and Section 58(a) of the Civil Service Commission (CSC) Memorandum Circular No. 19, s. 1999 o the Uniform Rules on Administrative Cases.”

Ang resolusyon ng kaso na may petsang Marso 28, 2005, na naging dahilan ng pagkakatanggal ni Lapis sa serbisyo publiko, dagdag ng Comelec.

Sa ilalim ng Local Government Code, ang pagtanggal sa pampublikong opisina dahil sa kasong administratibo ay itinuturing na batayan para sa diskwalipikasyon.

Bukod kay Lapis, nauna nang diniskwalipika ng Comelec ang isa pang kandidatong kapitan ng barangay dahil sa paglabag na may isang taon at kalahating sentensiya; at dalawa pang SK chairperson na kandidato para sa maling representasyon sa kanilang mga certificate of candidacies (COCs).

Ang tatlong ito ay sina Aniano Pancho Capinig ng Barangay Cabas-an, Aroroy, Masbate; Ivy Jane Parohinog Miranda ng Barangay Malag-it, Calinog, Iloilo; at Merson C. Calubag ng Barangay Magtangale, San Francisco, Surigao del Norte.