PHIVOLCS NAGPALABAS NG VOG ALERT SA TAAL VOLCANO

NAGPALABAS ng vog alert ang Philippine Institute of Volcanology and Seismology (Phivolcs) sa Taal Volcano nitong Martes makaraang mabalot ng makapal na smog ang bulkan.

Ayon sa Phivolcs, ang volcanic smog o vog ay naobserbahan sa bahagi ng Taal Caldera ng alas-2 ng hapon nitong Martes.

Noong Lunes ay nagbuga ito ng 6,837 tonelada ng sulfur dioxide.

Batay sa datos mula sa Batangas Provincial Disaster Risk Reduction Management Office apektado ng vog ang mga lugar ng Agoncillo, Laurel, Balete, Sta. Teresita, Calaca, Mabini, Mataas na Kahoy, Lemery, San Nicolas at Talisay.

Kaugnay nito, pinayuhan ni Phivolcs Director Teresito Bacolcol ang publiko na mag-ingat laban sa vog at iwasan muna ang maglalabas ng bahay.

” Magsuot ng masks, uminom ng maraming tubig at iwasan muna ang maglalabas ng bahay,” payo nito.

Ang vog ay isang uri ng polusyon sa hangin na sanhi ng bulkan. Binubo ito ng mga pinong patak na naglalaman ng volcanic gas tulad ng sulfur dioxide at maaring magdulot ng iritasyon sa mata, lalamunan at respiratory tract.

Kabilang sa mga sensitibo sa  masamang epekto ng vog ang mga taong may kondisyon sa kalusugan tulad ng hika, sakit sa baga at sakit sa puso.

Ang Taal Volcano ay nananatiling nasa Alert Level 1.